काठमाडौं–नेकपा (एकीकृत समाजवादी) सचिवालयबाट मन्त्रीका लागि सिफारिस भएको तीन सातापछि मन्त्रीमण्डल हेरफेर भएको छ। पर्यटन, संस्कृति तथा नागरिक उड्डयनमन्त्रीमा जीवनराम श्रेष्ठ, सहरी विकासमा मन्त्री मेटमणि चौधरी, श्रम, रोजगार तथा सामाजिक सुरक्षामा शेरबहादुर कुँवर र स्वास्थ्य तथा जनसंख्यामा भवानी खापुङ नियुक्त भएका हुन्। हिरा केसी स्वास्थ्य राज्यमन्त्री नियुक्त भएका हुन्। उनीहरुको सपथ सोमबार हुँदैछ। एकीकृत समाजवादीभित्र उनीहरू जनाधार बलियो भएका नेताहरूमा पर्छन्। उनीहरू सबै प्रतिनिधि सभामा प्रत्यक्ष निर्वाचित भएर प्रमाणित गरिसकेका नेताहरु हुन्।
मेटमणि चौधरी
२०७४ सालमा पहिलोपटक प्रतिनिधि सभामा निर्वाचित भएका हुन् मेटमणि चौधरी। दाङ १ बाट निर्वाचित उनी आगामी निर्वाचनमा एकीकृत समाजवादीबाट जित्न सक्ने उम्मेदवारको सूचीको अग्रपंतिमा पर्छन्।
एमालेमा दाङकै अर्का नेता शंकर पोखरेलबाट 'पेलिएर' ओली गुटदेखि ओली विद्रोहीसम्म हुन पुगेका उनी प्रभावशाली नेता मानिन्छन्। लामो समय ओली समूहमा रहेका उनी नवौं महाधिवेशनअघि नेपाल समूह प्रवेश गरेका हुन्। सोही समूहबाट केन्द्रीय सदस्यमा निर्वाचित उनलाई एमाले अध्यक्ष केपी ओलीले २०७१ सालमा दाङ इन्चार्ज बनाएका हुन्।
गत निर्वाचनमा दाङ १ बाट चौधरीले ३७ हजार ९०८ मत प्राप्त गरेका थिए भने उनका निकटतम प्रतिद्वन्द्वी नेपाली काँग्रेसकी सुशीला चौधरीले जम्मा २४ हजार ७० मत प्राप्त गरिन्। सत्ता गठबन्धनका अन्य दलबाट उक्त क्षेत्रमा प्रभावशाली नेतासमेत नभएकाले मेटमणिले टिकट पाउने सम्भावना बलियो छ।
तीन क्षेत्र भएको दाङको क्षेत्र नं २ मा माओवादी केन्द्रले कृष्णबहादुर महराका लागि आफ्नो भागमा पार्न खोज्नेछ भने क्षेत्र नं ३ मा कांग्रेसका दीपक गिरी छन्।
जीवनराम श्रेष्ठ
खेल क्षेत्रमा लामो समय सक्रिय भएर राजनीतिमा पुगेका हुन् जीवनराम श्रेष्ठ। राजनीतिमा पनि उनी 'खेलाडी' बनेर निस्केका छन्। पहिलोपटक सांसद बनेका उनी मन्त्रीसमेत बन्ने सफलतानिकट छन्।
राष्ट्रिय खेलकुद परिषद्का सदस्य-सचिव, नेपाल ओलम्पिक कमिटीका अध्यक्षसमेत बनेका उनी २०७४ सालमा काठमाडौं ८ बाट प्रतिनिधि सभामा प्रत्यक्ष निर्वाचित भए। उनले नेपाली कांग्रेसका उम्मेदवार नवीन्द्रराज जोशीलाई पराजित गरेका हुन्। २०७० सालको निर्वाचनमा भने उनी जोशीबाट यही क्षेत्रमा पराजित भएका थिए।
काठमाडौं ८ मा गठबन्धनका तर्फबाट श्रेष्ठको दाबी बलियो रहनेछ। किनभने उक्त क्षेत्रका नेपाली कांग्रेसका प्रभावशाली नेता जोशीको निधन भइसकेको छ।
भवानी खापुङ
स्वास्थ्य मन्त्रीमा बढुवा भएका भवानी खापुङ तेह्रथुमबाट टिकट पाउने सम्भावना भएका नेता हुन्। दुईपटक निर्वाचित भइसकेका छन् उनी। २०६४ को संविधानसभा निर्वाचनमा पराजित खापुङ २०७० र ०७४ मा निर्वाचित भएका हुन्।
२०७४ मा तत्कालीन भौतिक पूर्वाधार राज्यमन्त्री सीता गुरुङलाई २ हजार २१ मतले पछि पार्दै विजयी भएका थिए। खापुङले २१ हजार ३ सय १५ मत प्राप्त गरेका थिए। गुरुङले १९ हजार ३ सय १४ मत पाएकी थिइन्।
बहुदल पुन:स्थापनापछि तेह्रथुमबाट निर्वाचित हुनेमध्येबाट मन्त्री बनेका उनी पहिलो हुन्। त्यसपछि भएका ६ वटा निर्वाचनमा एमालेका विजय सुब्बा २ पटक, एमालेकै सुरेन्द्र फोम्बो र कांग्रेसका तुलसी सुब्बा १–१ पटक सांसद भए पनि मन्त्री हुन सकेनन्।
शेरबहादुर कुँवर
शेरबहादुर कुँवर अछाममा एमालेको संगठन बनाउने नेतामध्ये पर्छन्। अछाम एमालेका संस्थापकमध्येका उनी २०६४ सालमा नेकपा एमाले कमजोर बन्दासमेत अछाम १ बाट निर्वाचित हुन सफल भएका थिए।
माओवादी सबैभन्दा ठूलो दल बनेको उक्त समयमा भीम रावल समानुपातिक बसे। जनस्तरमा लोकप्रिय हुँदाहुँदै पनि उनले २०७० र २०७४ को निर्वाचनमा उक्त क्षेत्र भीम रावलका लागि त्याग गरे। एकपल्ट समानुपातिक र अर्कोपल्ट राष्ट्रिय सभामा गए।
२०४९ मा एमाले जिल्ला कमिटीको सचिवालय सदस्य, २०५४ सालमा उपसचिव, २०६२ मा सचिव हुँदै २०६९ देखि दुई कार्यकाल जिल्ला अध्यक्ष भइसकेका थिए। उनी एकीकृत समाजवादीतर्फ लागेपछि अछाममा ठूलो शक्ति उनीसँग गएको छ। अछामका दुई क्षेत्रमध्ये एउटामा कांग्रेसले दाबी गर्दा अर्कोमा स्वाभाविक रुपमा एकीकृत समाजवादीले दाबी गर्न सक्छ। त्यस्ताे अवस्थामा उनी टिकट पाउन सक्छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751632751.png)
-1751533150.jpg)
-1749826086.png)
